2020 илъэсым и Сэтэнай

 Уджыхъу Марет Адыгэ лъэпкъым илъэс 40-м къехъугъэу фэлажьэ, ц1ыфыбэхэр зэрыгушхорэ артистхэм ащыщ, ныдэлъфыбзэм икъэухъумэн пшъэрылъ шъхьа1эу зыфегъэуцужьы. Жъоныгъуак1эм и 2-м 1950-рэ илъэсым къуаджэу Джэджэхьаблэ Марет къыщыхъугъ. Иц1ык1угъом щегъэжьагъэу артист хъуным к1эхъопсыщтыгъэ. Я 9-рэ классыр къызеухым Ленинград ( джы СанктПетербург ) дэт институтым аштагъ ык1и апшъэрэ гъэсэныгъэ ащ щызэригъэгъотыгъ. 1976-рэ илъэсым Адыгэ Хэкум къыгъэзэжьыгъ. Ащ къыщегъэжьагъэу лъэпкъ театрэм щэлажьэ. Илъэс 40-м къык1оц1 роль 200 фэдиз къыш1ыгъ. «Шапсыгъэ пшъашъ», «Насыпым игъогу», «Пщыоркъ зау», «Тэтэжъмэ яорэд», «Сомэ мин 600», «Мэдэя»,«Тыкъэсыжьыгъ»зыфи1орэ спектакльхэм ык1и нэмык1ыбэхэм закъыщиш1ыгъ. Ащ нэмык1эу Адыгэ телевидением илъэс заулэрэ Марет щылэжьагъ. Лъэпкъ шэн-хабзэхэм яухъумэн фэгъэхьыгъэ къэтынхэр ыгъэхьазырыгъ,сэмэркъэу зыхэлъ фильм к1акохэм ахэлэжьагъ, адыгэ тхак1охэм яусэхэм къяджэзэ къэтынхэ тыритхэщтыгъэх.

Хэхэсхэмрэ хэкурысхэмрэ язэпхыныгъэ нахь пытэ хъуным Уджыхъу Марет псэемыблэжьэу дэлажьэ. 1эк1ыбым щыпсэурэ ык1и къик1ыжьырэ тилъэпкъэгъухэм афэгумэк1ы, ныдэлъфыбзэм икъэухъумэнк1э ык1и изэгъэш1энк1э 1эпы1эгъу мэхъу. 2008 – рэ илъэсым Тыркуем къик1ыжьыгъэ тилъэпкъэгъухэм ялъэ1ук1э ныбжьык1э театральнэ купэу «Щыгъыжъый» зыфи1орэр зэхищагъ. Сабыйхэм яныдэлъфыбзэ ш1у алъэгъунымк1э, аш1энымк1э ар амалыш1у хъугъэ. Хэкум къыщыхъугъэ сабыйхэри , 1эк1ыб хэгъэгу зэфэшъхьафхэм къарык1ыжьыгъэхэри «Щыгъыжъыем» непэ хэтых. Аныбжь илъэсихым къыщегъэжьагъэу 17-м нэсы. Джэгук1э шъуашэм илъэу Марет сабыймэ 1оф адеш1э, Адыгэ тхак1охэм яусэхэр, 1уры1упчъэхэр, пшысэхэр , гущы1эжъхэр арегъаш1э. Сэмэркъэу къэгъэлъэгъон ц1ык1ухэр , Нарт эпосым щыщ пычыгъохэр къарегъэш1ы. 2017-рэ илъэсым Тыркуем щы1э Кавказ Хасэхэм яфедерациеу «Кафед» зыфи1орэм «Щыгъыжъыер» мы хэгъэгум ригъэблэгъэгъагъ, 2019-рэ илъэсми ят1онэрэу ныбжьык1эхэр Тыркуем ащэхи къэлэ зэфэшъхьафхэм къэгъэлъэгъонхэр къыщатыгъ.

Лъэпкъ лъэмыджыр зыгъэпытэгъэ лъэубэкъухэм ар ащыщ хъугъэ. Адыгэ хасэр агъэпсы зэхъум ащ ик1эщак1охэм ясатыр Уджыхъу Марет хэтыгъ. «Ны хасэм» непэ итхьэмат. Ныдэлъфыбзэм икъэухъумэн илъэсыбэ хъугъэу зэрэдэлажьэрэм фэш1 , 2019 илъэсым Адыгэ республикэм икъэралыгъо ш1ухьафтын Л1ышъхьэу Къумп1ыл Мурат къыфигъэшъошагъ. «Адыгеим ищытхъузехь» зыфи1орэ бгъэхалъхьэу къыратыгъэри анахь лъап1эхэм ащыщ. Джащ фэдэу «Адыгеим илъэпкъ артист» , «Урысыем игъэш1огъэ артист» зыфи1орэ щытхъуц1эхэр къылэжьыгъэх. Теуцожь Цыгъо ыц1э зыхьырэ бгъэхалъхьэми изехьак1у. Уджыхъу Марет бзылъфыгъэ насып дахи ыгъотыгъ. 1989 илъэсым Беданэкъо Аднан шъхьэгъусэ фэхъугъ. Ащыгъум Аднан Сирием щыпсэущтыгъэ, къызызэрэщэхэм ыуж Хэкум къыгъэзэжьыгъ. Аднанрэ Маретрэ к1элит1у зэдап1угъ- Нартрэ Кощбайрэ. Къызхэк1ыгъэхэ лъэпкъым фэшъыпкъэхэу , яныдэлъфыбзэ ш1у алъэгъоу ахэр агъэсагъэх.